Luc 1:59-63

59Et factum est in die octavo, venerunt circumcidere puerum, et vocabant eum nomine patris sui Zachariam.

60Et respondens mater ejus, dixit : Nequaquam, sed vocabitur Joannes.

61Et dixerunt ad illam : Quia nemo est in cognatione tua, qui vocetur hoc nomine.

62Innuebant autem patri ejus, quem vellet vocari eum.

63Et postulans pugillarem scripsit, dicens : Joannes est nomen ejus. Et mirati sunt universi.